News

تحديث مسابقة أرض طيبه ٢٠

*** تحديث مسابقة أرض طيبه ٢٠ ***

طبعا كلنا شايفيين الظروف الإستثنائيه اللى بيمر بيها العالم كله مش مصر وبس، وعلشان كده مسابقه أرض طيبه ٢٠ المؤجله هتكون هي كمان مسابقه إستثنائيه، بس قبل مانبدأ حابين نتقدم بخالص الشكر والتقدير للمهندس/ عمرو نجيب اللى كان عامل رئيسى في تذليل العقبات اللى واجهتنا في إختيار المكان.

أول شيئ حابين نأكد عليه إن إلتزام الساده المشتركين هايساهم بشكل أساسى إن إحنا نقدر ننظم مسابقة الأرض الفرعونيه ٢٠ في ميعادها إن شاء الله فى شهر ديسمبر، يعنى اللى مش هايتوفق في التسجيل والإشتراك في المسابقه دى إن شاء الله يقدر يشارك في المسابقه اللى بعدها.

لجنة المسابقات أخدت إجراءات كتير علشان تقدر تنظم المسابقه، واللى بنطلب من جميع المشتركين الإلتزام بيها، مع مراعاة جميع بروتوكولات السلامه المتبعه:

  • عمل تحليل الكرونا للحكام قبل السفر لمصر وقبل المغادره لبلدهم.
  • المسابقه مقامه داخل ملعب خماسى وهاتضم رينجين وعلشان كده بنعتذر عن قبول أي عروض رعايه أو دعايه داخل المسابقه.
  • تحديد توقيتات لإشتراك السلالات في المسابقه لكل يوم، واللى بنطلب من المشتركين إنهم يلتزموا بالحضور فقط في التوقيتات الخاصه بسلالاتهم علشان مايكونش في تجمعات خارج الملعب.
  • بنأكد تانى على النقطه اللى فاتت إنه مش هيكون متاح أي أماكن إنتظار خارج الملعب لمنع أي تكدس، وكل مشترك هيكون مسؤل عن أمن وسلامة كلبه.
  • لن يسمح بتواجد داخل الملعب غير الكلب المشترك والهاندلر بتاعه.
  • بنعتذر عن عدم دخول زائرين أو مصاحبين للمشتركين سواء من الأهل أو الأصدقاء، الكلب والهاندلر بس جوه الملعب.
  • جميع المتواجدين داخل الملعب ملتزمين بقواعد التباعد الإجتماعى ولبس الماسك طوال فترة التواجد داخل الملعب.
  • هايتم التحكم في عدد الكلاب داخل الرينج طبقا لعدد الكلاب في الكلاس الواحد.
  • بعد الإنتهاء من المسابقه، المشترك اللى كلبه معندوش تصفيات بيتفضل بالمغادره نهائيا من الملعب والمنطقه المحيطه علشان يدى فرصه لمشتركين السلالات التانيه إنهم يتواجدوا بسهوله في ميعاد سلالاتهم.
  • هانفتح باب التسجيل في المسابقه لعدد محدود فقط من الكلاب من السلالات المختلفه علشان فى مشتركين موجودين بالفعل قبل قرار تأجيل المسابقه ودول اللى هانكمل عليهم كتالوج المسابقه بشكل يساعدنا على ترتيب جدول اليومين وعلشان كده هانطلب من المشتركين إنهم لما هايسجلوا هيكونوا محطوطين في قايمة إنتظار.
  • باب التسجيل مفتوح إعتبارا من السبت ١٢ سبتمبر لحد الإثنين ٢١ سبتمبر وزى ماوضحنا كل المشتركين الجدد هايكونوا في قايمة إنتظار بتتعدل كل يوم لحد ماهانوصل للعدد المطلوب.
  • فحص الكلاب للزيرو بيدجرى هايتم خلال يومين المسابقه، علشان كده لازم المشتركين في الفحص يكونوا متاحين يومين المسابقه (الجمعه والسبت) لإن بعد تنسيق الكتالوج بس هيكون واضح يوم وميعاد إشتراك كلابهم سواء أول يوم ولا تانى يوم.
  • كل الكلاب هايتعملها سكان للمايكروشيب قبل دخول الملعب حتى الكلاب اللى داخله الفحص لازم تكون محقونه مايكروشيب.
  • الساده المشتركين في مسابقه واحده فقط من المسابقتين لازم برضه يكونوا متاحين يومين المسابقه (الجمعه والسبت) لإن بعد تنسيق الكتالوج بس هيكون واضح يوم وميعاد إشتراك كلابهم سواء أول يوم ولا تانى يوم.
  • بنطلب من جميع الساده المشتركين متابعة صفحة المسابقه على الفيس بوك اللى هايتم الإعلان فيها عن أي مستجدات تخص المسابقه.

طبعا بنأكد على وعى جميع المشتركين في تعاونهم وإلتزامهم اللى هايخلينا نقدر نكرر المسابقه دى في ظل الظروف الصعبه اللى بنمر بيها وكمان نصدر صوره حضاريه عن إلتزامنا بالتعليمات والإجراءات الوقائيه اللى هاتسهل علينا إستضافة الحكام في المرات التانيه لو الظروف دى طولت.

تم إختيار المهندس/ طارق داوود، كمفوض لجنة المسابقات لمسابقة أرض طيبه ٢٠، واللى هيكون مسؤل عن متابعة إلتزام جميع المشتركين بإجراءات المسابقه اللى تم ذكرها وعمل تقرير عن أي مخالفه بإسم المشترك وإسم كلبه واللى طبعا بنتمنى إنه مايكونش في أي مخالفات تذكر.

حظ سعيد لجميع المشتركين،،،

 

.

Our Parteners